Cherita Rakyat
Jejuluk
Sempama
Glosari
 
 
 
 
 
 

SEMPAMA

Jaku sempama ba kitai bansa Iban endang iya besai amat guna laban iya mai serangkap rampa reti ti besai sereta dalam. Iya mungkur leka jaku kelaung jaku silup, jaku tapis enggau jaku tetak. Sempama tu kekadang mai semina siti leka jaku, dua leka jaku, tiga leka jaku tauka mayuh agi ari nya.

Sempama ti ngena seleka leka jaku iya nya baka tabin, layu, meruap, chelap, sarat, enggau ke bukai.

Sempama ti bediri ngena dua leka jaku aja baka buah lemba, betubuh bisi, achuk rangkang, urat kayu enggau ke bukai.

Sempama ti ngundan tiga leka jaku ti seruran dikena kitai mega baka angat tai manuk, makai buah emperingat, buah tamang raja enggau ti bukai.

Sempama ti ngena lebih ari tiga leka jaku sereta bisi berambai munyi ba ujung ayat baka ti di baruh tu:

         Lindung tuga lindung batang.

Di lubuk ngauk di rantau nyengkau

Untung sekarung rugi seguni.

Mansai sungai ngena tapa,

nebang tapang ngena lungga.

Hari bebini hari betutus, tutus gerai bini mati.

Ngarapka pagar, pagar makai umai.

 Orang Engkari ngumbai diri nadai besi, dinga besehari-sehari ngambuh duku,

Orang Julau madahka diri nadai semakau, peda bekeliau api ruku.

 Nyadi bansa kitai Iban besempama dikena ngayanka penalam sereta pemesai basa ngagai pangan diri, temuai pia mega sebarang orang bukai. Sempama tu nyadika chura baju kitai siku-siku laban kenyau ari kitai nemu bejaku dia kitai endang diajar apai indai niti adat basa. Sempama mega dikena ngemanis tauka ngelangkungka pekara ti dikejakuka. Kelimpah ari nya iya mega dikena nyilupka penemu ti kasar ngambika enda tak kelalu kasar didinga. Ngarapka utai tu meruan dikena nambahka penemu pasal pengaya jaku Iban ba kitai mayuh sereta tau nyadika teladan pengidup semua. Nya alai nangkanka tu deka dirintaika sekeda sempama ti semampai bisi dikena sereta selalu bisi kaul enggau pengidup kitai besehari-hari.

BAGI 1

NO.

SEMPAMA

RETI

AYAT CHUNTO

1

Ikak lelanggak ikan enda ngaban, kudi memuri hari enda ujan.

Ngembuan pengingin ati ngagai orang tang orang nya enggaika iya.

Igat lama endar udah ingin ke Yak tang iya tak semina ikak lelanggak ikan enda ngaban, kudi memuri hari enda ujan laban Yak endang nadai ati ke iya.

 

2

 

Ngarapka kijang dalam babas.

Ngarapka utai ke bedau temu ulih tauka enda.

Kitai anang ngarapka kijang dalam babas aja enti kitai enda nurun ngiga utai nadai tau datai kediri ke rumah.

 

3

 

Rusa di kaki tangga enda diemparu, kunchit di tisi langit deka ditunu.

Utai ke semak udah temu ulih enda diambi tang utai ke jauh sereta bedau temu ulih tauka enda deka digiga.

Balat ga Jang, rusa di kaki tangga enda diemparu, kunchit di kaki langit ka ditunu rindu pegi ke Brunie ngiga pengawa laban di menua diri pan mayuh endur bekuli.

4

Pandak mulut engkerasak, panjai mulut kitai.

Orang ke deka bendar betenah tauka bejai orang bukai.

Pama bendar mulut Indai Sanu nya, pandak mulut engkerasak panjai mulut kitai enti iya udah nusui utai.

5

Baka pipit ke deka nelan buah embawang.

Baka orang ke deka ngereja pengawa ke enda ulih ditapi tauka ditangkup iya.

Dom baka pipit ke deka nelan leka embawang deka nangkup pengawa ke ngemesai nya tang iya nadai penemu enggau pengelandik ba pengawa nya.

6

Untung bulih beliung enda ngambuh, mudah bulih peredah enda ningkuh.

Bulih utai tang nadai pengiruh tauka pemedis ngulihka iya. Bulih utai enggau mudah.

Sabit untung bulih beliung enda ngambuh, mudah bulih peredah enda ningkuh lebuh ke jadi enggau Idut laban Idut udah bisi anak dulu dua iku.

 

7

 

Baka langkau enda ngipakka dampa, baka lalau enda ngipakka tangga.

 

Pengawa ke dikereja enda ngipakka langkar tubuh.

Pemanah pengawa ke dikereja Apai Salun baka langkau enda ngipakka dampa, baka lalau enda ngipakka tangga enti disbanding enggau penegap langkar tubuh iya.

 

8

 

Anang guai manjung di pala wung.

Anang guai gaga enti utai ke dikereja tauka dikinginka bedau temu ulih.

Lebuh ngereja pengawa kitai anang beguai manjung di pala wung enti utai nya bedau temu ulih digaga kitai.

9

Nibarka jala enda betating.

Mansutka jaku enda berunding dulu.

Lebuh sida serumah baum, Pachal suah bender nibarka jala enda betating lebuh ke mansutka jaku.

 

10

 

Ngasaka nyawa langau.

Ngasaka diri aja, ngumbai indu dara dekaka iya.

Ujang semina ngasaka nyawa langau melanja indu dara makai ngirup tang iya enda nemu diri ditipu orang.

 

11

 

Baka buyah ke nabak diri ke api.

 

Ngereja pengawa ke ngemedis diri.

Sagup baka buyah ke nabak diri ke api lebuh iya nguji ngerara orang ke benung balaya laban iya empu kena palu orang.

12

Sapa ke makai chabi nya meh berasai pedas.

Orang ke ngereja penyalah nya meh ngasaika penyalah diri.

Chakoh enda bemunyi lebuh pengajar nanyaka sapa bagi sida sekelas ke selalu inggar laban iya nemu sapa ke makai chabi nya meh berasai pedas.

13

Orang di ili munsi tubu, orang di ulu balut miang.

Orang rumah bukai ke bisi penusah tang kitai serumah ke enggau kiruh.

Dalam kandang setaun tu kami empat buah rumah ke semakai suah bendar dituntung penusah, orang di ili munsi tubu orang di ulu balut miang.

14

Ragak riang, enti dipansuh enda bulih seputung munti.

Balat seregah tang penemu ke dikembuan enda tetipakka seregah.

Igat suah disebut orang ragak riang enti dipansuh enda bulih seputung munti laban pama endar seregah iya tang penemu enngi iya agi kurang.

 

15

 

Labang apai labang anak.

Enti apai indai enda manah ulah, anak pan murihka penyai apai iya.

Apai Supui seduai anak iya selalu disebut orang labang apai labang anak laban seduai sama enda manah jari.

 

16

 

Baka kepayang ngadaka dilah.

 

Nyebut aja tang enda ngereja.

Lebuh ngereja pengawa bebala mayuh kitai anang semina baka kepayang ngadaka dilah tang kitai mesti sama-sama ngereja iya.

17

Besai periuk besai ga kerak, besai beliung besai ga abak.

Orang ke begaji besai mayuh ga belanja iya.

 Sudit begaji besai lalu mayuh utai ke berega mar ulih beli laban iya disemaka besai periuk besai kerak, besai beliung besai ga abak.

18

Lawa kerubung enda perisi.

Balat seregah tang kurang penemu tauka belanja dikembuan.

Awat nya lawa kerubung enda perisi, gari dikena amat manah tang kuchik iya puang.

19

Bisi niki nibung, bisi niki pinang.

Bechiping adat.

Orang ke nyadi tuai anang bisi niki nibung bisi niki pinang lebuh mutuska pehcara ke diatur sida.

 

 

20

 

 

Duruk bubut enggau ruai.

Beduruk tauka ngereja pengawa ke enda setipak enggau enggi pangan diri.

Lebuh ke beduruk ngetau ngagai sida apai Simpi kemari dia deh apai Umang nyata bendar baka duruk bubut enggau ruai laban iya enda bebendar baka iya ke ngetau umai diri empu.   

 

21

 

Bubut tau ruai enda.

Dua iku orang ngereja pengawa ke bebida pemanah.

Kami serumah enda tentu lantang ati ngagai apai Bubui ke nyaga utai kunsi kami serumah laban bubut tau ruai enda lebuh deka ngena utai nya.

22

Mansai sungai ngena tapa, nebang tapang ngena lungga.

Deka ngereja pengawa ke temu enda ulih tangkup.

Pengawa ke deka diaduka kami serumah mar sereta tusah tang kami nguji mansai sungai ngena tapa, nebang tapang ngena lungga.

23

Remaung di rumah, raung di tanah.

Di rumah kering, regas tang enti gawa di tanah nadai tapi.

Igat Rungak nya remaung di rumah raung di tanah, tubuh aja besai tang nadai tapi.

 

24

 

Batu tungku pan tau besengki.

 

Diri menyadi pan tau belaya.

Amat pan kitai sekaban nadai kala belaya enggau pangan ngelamatu tang taja pia batu tunggu pan tau meh besengki.

25

Baka pitak ke dibuai mata.

Nadai temu tunga, nadai temu tuju.

Udah Suat ke dianu indai iya dia baka pitak ke dibuai mata nyau selalat ringat ke ruai ke bilik.

 

26

 

Baka ukui deka beranak.

Baka ukui labuh anak.

 

Kasak-kasak, enda jenuh pendiau.

Laban ke keran deka meda pemajik gamal anak dara temuai ke baru datai dia Igat nyau baka ukui ke deka beranak pansut tama ke ruai ke bilik serta nilik ari penjan.

27

Baka mayau enggau ukui.

Enda tau begulai, selalu belaya.

Andau seduai Marin seruran baka mayau enggau ukui selalu deka bekerantam enggau pangan diri.

28

Baka keli ditetak iku.

Enda entap burit, selalu kundang kuit bejalai kin kitu.

Endun suah disindir indai iya baka keli ke ditetak iku meda iya enda entap diau ba bilik diri.

 

 

29

 

 

Lansar tau nyadi lubuk, lubuk tau nyadi lansar.

Orang ke mensekin sereta tusah pendiau tau nyadi kaya sereta lantang lalu orang ke udah kaya sereta nyamai diau tau nyadi mensekin papa.

Sida Agum sebilik ukai main pengaya sereta sumbung agi iya benung gawa perintah suba tang diatu lansar tau nyadi lubuk, lubuk tau nyadi lansar lalu pengidup sida semakin merinsa.

 

30

 

Manuk lepas jari bau tai.

 

Udah bulih peluang enda dikena, udah peluang nya lepas baru nesal.

Ajin ngaga diri enggai lebuh dibai indu dara betemu kemari laban iya enggai enda saritu tang diatu manuk udah lepas jari bau tai laban indu enggai agi betemu enggau iya.

 

31

 

Baka timau jampat medah.

Enda liat ngereja pengawa, jampat leju.

Akat ukai main pengerajin lebuh berengkah ngepunka  semua pengawa tang iya baka timau jampat medah, enda teapuska pengawa iya lalu matak diri.

 

32

 

Bekikis bulu betis bebuai bulu gundai.

Beambis belanja enggau reta tengkira dikena nyengulaka bala anak.

Kami duai melaki bini bekikis bulu betis bebuai bulu gundai empa pemendar nyengulaka bala anak.

 

33

 

Baka perau ke patah kemudi.

Pengawa ke dikereja nadai pemujur laban nadai orang ke nemu ulih ngiring kitai.

Sekumbang apai kami ke udah mati dia kami menyadi baka perau ke patah kemudi lebuh ngereja pengawa ke berat sereta tusah laban kami bela agi mit.

34

Baka mumban ke teruju ai.

Baka pendiau ke enda tentu tegap tang enda ga tak kelalu merinsa.

Pendiau sida Chawit sebilik indah enda baka mumban ke duju ai laban sida sampal enda tentu rajin gawa.

 

35

 

Untung sekarung rugi seguni.

Amu deka bulih untung mayuh tang tulihka pengerugi.

Apai Ipa untung sekarung rugi seguni lebuh nyual lada tadi laban minggu nyin kemari lada agi tinggi rega tang iya bedau ka nyual.

SAMBUNG BAGI 2